musi pi pipi linja

mi wile pana e musi sin · jan wan anu jan mute li ken lon musi ni · open la o kepeken lipu walo wan · o sitelen e sike lili pimeja mute lon lipu · sike lili ni li moku pona a · 

sina pipi · o sike e moku wan · ni li sina pipi · jan ante li lon musi la jan ante ale kin li sike e moku wan · jan ale o kepeken kule ante lon wile ona · ni li ona pipi ·

ni li open musi · pipi li jo e moku la ni li pona · moku li ken suli e pipi · jan pipi wan li open e musi la ona li suli e pipi kepeken sike sin lon poka ·

ni la pipi li kama pipi linja · sike pipi sin li lon la jan pipi ante o suli e pipi ona · pipi li wile suli li wile moku e moku ale a · pipi li ken tawa moku wan lon tenpo pi jan wan · ona li kama pipi linja suli · 

ken la pipi li wile e moku lon poka ante pi pipi ante · taso sijelo pipi li lon poka ni la tawa pona li ken ala · pipi li wile tawa moku lon poka ante la ona li wile tawa sewi pi sijelo pipi · ni li wile e wawa tan pipi la pipi li ken ala awen jo e moku ale · ona li tawa sewi lon sijelo pipi wan la ona li pana weka e moku wan tan monsi ·

moku monsi li ken kama moku sin tawa pipi ante anu pipi sama · taso pipi li wile e moku wan lon poka weka pi sijelo pipi tu la seme li kama · a · pipi li wile tawa sewi pi sijelo pipi tu · ni la ona li pana e moku tu kin tan monsi · pipi li tawa lon sijelo pipi mute la ona li pana e moku mute tan monsi ·  

musi pipi ni li kama pini kepeken nasin seme · a · ken la ona li pini ala · pipi li awen pana e moku tan monsi la pipi li ken awen mute li ken awen tawa li ken awen kama suli linja · taso ken la musi li kama pini a · pipi li ken ala tawa moku sin la ona li ken ala tawa · ona li lape pona tan moku pona · o musi pona · o pipi pona ·