kalama: pona o

mi toki pona e musi kalama luka tu tu pi tenpo lete tan toki ante. musi wan ni li kalama pini li kalama “Freude schöner Götterfunke” anu kalama “Ode an die Freude” tan toki Tosi. kalama ni li tan jan Beethoven. nimi pi kalama suli li “musi kalama nanpa luka tu tu” anu “Sinfonie Nr. 9 d-Moll op.125”

kalama mi li ike.
kalama ni li kepeken kalama ante (kepeken nasin CC-0).

pona o, sina sama suno mun tan sewi pona;
mi pi pilin wawa li tawa tomo pona sina!
wawa sina li wan sin e tu pi nasin kulupu.
lon awen sina la jan ale li kama jan sama!

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama: sike pini en sike sin

mi toki pona e musi kalama luka tu tu pi tenpo lete tan toki ante. musi wan ni li kalama “Old Year and New Year” tan toki Inli.

kalama mi li ike.
sina wile e nasin kalama la, o lukin e ona lon ni. ante la, o lukin e sitelen lon anpa suli.

ilo tenpo mu li mu
e tenpo pi mun sewi.
ona li mu e weka
pi tenpo sike pini.

ona li mu e kama
pona pi sike sin kin.
mu mute li mu suwi!
pona o tawa sike sin.

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama: o awen e tenpo pini

mi toki pona e musi kalama luka tu tu pi tenpo lete tan toki ante. musi wan ni li kalama “Auld Land Syne” tan toki Kosi. (toki Kosi li sama lili pi toki Inli.)

kalama mi li ike.
kalama ni li kepeken kalama ante (kepeken nasin CC-0).

jan pi tenpo mi o weka tan sona anu seme?
jan en tenpo pini o weka ala weka tan sona?

o awen e tenpo pini lon sona, jan mi o.
mi moku e pona la mi awen e tenpo pini.

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama: pona o lon tenpo sewi

mi toki pona e musi kalama luka tu tu pi tenpo lete tan toki ante. musi wan ni li kalama “We Wish You a Merry Christmas” tan toki Inli.

kalama mi li ike.
kalama ni li kepeken kalama ante (kepeken nasin CC-0).

pona o lon tenpo sewi
pona o lon tenpo sewi
pona o lon tenpo sewi, lon sike sin kin
sina ale la, mi toki pona
pona o lon tenpo sewi, lon sike sin kin

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama: jan pana li kama

mi toki pona e musi kalama luka tu tu pi tenpo lete tan toki ante. musi wan ni li kalama “Morgen kommt der Weihnachtsmann” tan toki Tosi. ona li kalama pi jan lili.

kalama mi li ike.
kalama ni li kepeken kalama ante (kepeken nasin CC-0).

jan pana li pana lon
tenpo suno kama.
mi wile e sitelen
e lipu e musi ilo
e len pi sama soweli e ilo kalama kin

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama: jan lawa pona

mi toki pona e musi kalama luka tu tu pi tenpo lete tan toki ante. musi wan ni li kalama “Good King Wenceslas” tan toki Inli.

kalama mi li ike.
kalama ni li kepeken mu pi ilo kalama tan jan Theshaggyfreak (kepeken nasin CC-BY-NC).

jan lawa Wasa pona li lukin e ma lete.
tenpo suno sewi nanpa tu la ma li walo.
lukin la jan li lon ma li jo e mani lili,
li wile e seli li alasa e ijo tan ni.

“jan pali mi o awen, o pana e sona:
jan ma ni li jan seme, li lon tomo seme?”
“jan lawa o, tomo ona li lon weka mute,
li lon noka nena ma, lon poka pi ma kasi.”

“o kama e moku pona, e kiwen kasi kin.
mi tu li pana la ona li ken moku pona.”
jan pali en jan lawa li tawa lon nasin wan
li tawa lon kon wawa utala pi lete ike.

“lawa o, pimeja en kon kin li kama wawa.
wawa pilin li weka la mi ken ala tawa.”
“jan mi o, lon monsi mi, lon lupa tan noka mi.
tawa li lon insa ni la lete li ike lili.”

ona li tawa lon lupa noka pi jan lawa.
seli li kama tan lupa pi jan lawa sewi
tenpo ale la jan pona o awen e sona ni:
sina pana e pona la pona li tawa sina.

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama: tenpo suno kama

mi toki pona e musi kalama luka tu tu pi tenpo lete tan toki ante. musi wan ni li kalama “Morgen, Kinder, wird’s was geben” tan toki Tosi. kalama ni li kalama pi jan lili.

kalama mi li ike.
kalama ni li kepeken kalama ante tan jan Hermann-Josef Wolff (kepeken nasin CC-BY).

tenpo suno kama wan li pona
li kama e pilin pona
tomo mi la jan ale li sona
e suli tan suwi kama
tenpo lape wan taso la
tenpo suno musi li kama

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama musi: tenpo pona pimeja

mi toki pona e musi kalama luka tu tu pi tenpo lete tan toki ante. musi wan ni li kalama “Stille Nacht” tan toki Tosi anu kalama “Silent Night” lon toki Inli.

kalama mi li ike.
kalama ni li kepeken kalama ante (kepeken nasin CC0).

tenpo pona
pimeja la
lape li lon
jan tu taso
li lape ala
li mama sewi
jan lili sewi
suwi pona o
lape pona sewi (a)
lape pona sewi

sina wile lukin e toki ni pi toki Inli la, o lukin e wan kama ni:
If you want to read a translation, go to the next page:

kalama musi: ilo kalama li mu

mi toki pona e musi kalama luka tu tu pi tenpo lete tan toki ante. musi wan ni li kalama “Kling Glöckchen klingelingeling” tan toki Tosi. jan lili ale pi ma Tosi li sona e ona.

kalama mi li ike.
kalama ni li kepeken kalama ante tan jan Pianoführerschein (kepeken nasin CC-BY).

mu, ilo kalama li mu
kalama mu
o ken e mi lon insa
ma li lete ike
o open e lupa
ante la mi lete
mu, ilo kalama li mu
kalama mu

sina wile lukin e toki ni pi toki Inli la, o lukin e wan kama ni:
If you want to read a translation, go to the next page: