tenpo sike ni en tenpo sike pini wan la, ike li lon. sijelo pi jan mute li kama jaki. jan mute li moli. jan li wile ala e ni la ona li len e sinpin ona, li tawa ala kulupu, li telo e luka ona lon tenpo mute, li lon ala poka pi jan ante. ike ni li tan ijo pi lili mute mute a. ijo ni li ijo Kolona.
ijo Kolona li ken jaki e sijelo kepeken nasin seme? sijelo li poki mute pi lili mute. poki lili ni li wile e moku e ijo ante la ilo nena li lon selo pi poki lili. ilo nena li lukin e ni: ijo li kama la mi wile ala wile moku e ona? nena pona li lon ijo la, ilo nena li sona e ni: mi wile e ijo ni! taso ijo Kolona la nena li lon kin. nena li sama nena pona pi ilo nena. ni la ijo Kolona li ken kama lon insa pi poki lili. ona li insa la ike li kama tan ni: ijo Kolona li lawa e poki lili, li lawa e ni: poki lili li pali e ijo Kolona mute. ni li pakala e sijelo sina la sijelo sina li utala e ijo Kolona. ni la sijelo sina li pilin ike, li pana e ijo Kolona tawa jan ante, li ken moli.
taso jan li sona mute, li pali sona. ona li pali e telo. telo ni li sama ijo Kolona tawa utala pi sijelo sina, taso ona li pakala ala e sijelo, li kama ala mute sama ijo Kolona. ni la sijelo sina li sona utala e ijo Kolona, li ken utala wawa lon tenpo kama pi ijo Kolona.
telo ni li awen e jan mute tan jaki Kolona la, ona o tawa jan mute. telo mute ni li lon tan kulupu esun ante mute, li ken kepeken nasin ante mute. ma mute la, telo mute li lon, taso nasin suli tu li lon la telo li kepeken nasin wan.
o utala e nena pi ijo Kolona
linja lili li lon insa pi ijo Kolona, li lawa e ale pi ijo Kolona. linja lili la ijo Kolona li ijo Kolona, li jo e nena lon selo, li wile kama mute mute, li kama e ijo Kolona mute mute tan insa pi poki lili sijelo. jan sona li lukin e ijo Kolona la ona li kama sona e ni: mama nena li lon seme lon linja lili? ni la jan sona li ken pana e linja lili pi mama nena taso a.
jan sona li wile e ni: ijo Kolona ala en nena taso pi ijo Kolona li lon insa sijelo sina. linja pi mama nena li lon insa pi poki sijelo lili la, poki li sona pali e nena. ni la, sijelo sina li ken kama sona e nena, li kama ala pakala.
sijelo sina li sona e nena pi ijo Kolona la, ona li ken utala wawa e ijo Kolona.
nasin nanpa wan: ante pi ijo lili ante
telo li ken kepeken nasin ni:
ijo Kolona li ijo pi lili mute mute a, li ike. taso ijo ante pi lili mute mute a li lon, li ike ala tawa sijelo jan. ijo Ateno li ken ijo ni wan. jan sona li pana e mama nena pi ijo Kolona lon insa pi ijo Ateno.
ijo Ateno li tawa insa sijelo kin, taso ona li pakala ala e sijelo. ona li kepeken ilo nena ante lon poki lili sijelo. pali pi jan sona la, ona li pali li lawa e ni taso: poki lili pi sijelo sina li pali e nena pi ijo Kolona.
nasin nanpa tu: pali nena
telo li ken kin kepeken nasin ni:
sijelo sina la, poki lili li wile e moku. telo sijelo loje la, ilo lili li lon, li tawa e moku lili tawa poki lili la poki lili li ken moku e moku lili. ni la, jan sona li pali e ni: linja lili pi mama nena li lon insa sike lili. sike ni li sama moku tawa ilo moku pi telo sijelo loje, li sama moku tawa poki lili.
nasin ni li sin, li ken wawa kepeken mani lili.
o insa e telo ni
ike mute li tan ijo Kolona. telo pi ijo Kolona weka li lon jan mute mute la ike li ken kama lili, li ken kama weka. ni la, o toki tawa jan sona sina. sina ken la, o insa e telo ni lon sijelo sina. ni li pona tawa sina, li pona tawa kulupu, li pona tawa moli ala, li pona tawa jaki ala.
mi sona e nasin pi telo ni tan seme? sina sona toki Inli la, o lukin e toki ni: https://cen.acs.org/pharmaceuticals/drug-delivery/Without-lipid-shells-mRNA-vaccines/99/i8
open la, mi pana e toki ni tawa lipu tenpo.
pali pi toki pona tan jan Ke 